Óskarsverðlaunin verða afhent næstkomandi sunnudag, þann 24. febrúar, vestan hafs. Óvenjumikil spenna ríkir fyrir hátíðinni í ár þar sem það er algjörlega óútreiknanlegt hvaða listamenn hreppa hnossið.
Óskarsverðlaunin eru stærsti viðburður ársins í heimi kvikmynda og flykkjast stjörnurnar á rauða dregilinn til að sýna sig og sjá aðra. Eitt af því sem vekur ávallt mikla athygli á Óskarnum eru gjafapokarnir sem þeir sem tilnefndir eru fá. Gjafapokarnir eru veglegir og hleypur verðmæti á milljónum króna.
Nú er búið að afhjúpa gjafapokann á Óskarsverðlaununum sem fara fram næsta sunnudag, en athygli vekur að allir þeir sem tilnefndir eru fá utanlandsferð fyrir sig og gesti. Geta stjörnurnar valið um að fara til Íslands, Galapagos-eyja, Amazon eða Kosta Ríka og Panama. Því gæti farið svo að stórstjörnurnar Lady Gaga, Mahershala Ali, Bradley Cooper, Rami Malek og Christian Bale séu allar á leið til landsins, ásamt öðrum tilnefndum listamönnum.
Í gjafapokanum er einnig að finna handgert súkkulaði, áfengi, gosdrykki, smákökur, hótelgistingu í Grikklandi og sérgert glerlistaverk úr smiðju John Thoman.
