Sjónvarpsmaðurinn knái, Sindri Sindrason, hefur sett hús sitt við Baugatanga 8 í Reykjavík á sölu. Ekkert verð er gefið upp og óskað eftir tilboðum. Fasteignamatið er hins vegar 136,5 milljónir fyrir þetta rúmlega 320 fermetra hús.
Húsið er búið þremur svefnherbergjum og þremur baðherbergjum, en því fylgir einnig tvær stofur, sjónvarpsherbergi, hobbýherbergi, líkamsræktarherbergi með gufu og sturtuaðstöðu og tvær geymslur.
Innréttingar eru smekklegar, enda Sindri annálaður smekkmaður og hefur til að mynda stjórnað þáttunum Heimsókn á Stöð 2 um nokkurt skeið.
Sindri er hvers manns hugljúfi á Stöð 2 og hefur í gegnum tíðina verið duglegur að blása til mannfagnaða í þessu glæsilega húsi. Því er nánast hægt að slá því föstu að þar sé góður andi og þægilegt andrúmsloft.