Þingflokkur Sjálfstæðismanna hefur vakið mikla athygli að undanförnu vegna nýliðinnar kjördæmaviku, þar sem Sjálfstæðismenn fóru hringinn í kringum landið og heimsóttu kjósendur. Hafa Sjálfstæðismenn vakið mikla athygli á samfélagsmiðlum undir kassamerkinu #áréttrileið.
Ein mynd úr kjördæmavikunni vakti athygli, þar sem sjá mátti þingmenn Sjálfstæðisflokks, þar á meðal Bjarna Benediktsson, Áslaugu Örnu Sigurbjörnsdóttur og Sigríði Á. Andersen, baða sig í heitum potti.
Nú hefur myndin gengið í endurnýjun lífdaga á Reddit þar sem notandi að nafni icerevolution21 birtir hana með fyrirsögninni „Þegar potturinn er orðinn IceHot“. Er það vísan í frétt frá árinu 2015 þegar upp komst að Bjarni Benediktsson, fjármálaráðherra, væri skráður á stefnumótavefinn Ashley Madison undir nafninu IceHot1.
Skemmtilegar athugasemdir eru við þráðinn á Reddit, en þessi frá notandanum Lalli-Oni er í miklu uppáhaldi hjá Fókus:
„Fann mig einu sinni í Garðabæjarlaug og hvur andskotinn er Bjaddni IceHot ekki þarna að spyrja móttökuna hvort hann megi ekki skjótast aftur inn í klefa, hann hafi nefnilega gleymt veskinu sínu. Fjármálaráðherrann okkar gleymdi veskinu sínu! Vanhæfur!“
Þá blandar einn útlendingur sér í umræðuna, notandin nrileyjamesdoggo, og virðist ekki skilja samhengið því það eina sem hann skrifar er:
„Ég þarf að fara til Íslands.“