Tíu ára gömul íslensk stúlka, Anna Drakopoulou Sverrisdóttir fer með stórt hlutverk í meðfylgjandi tónlistarmyndbandi NRK sjónvarpstöðvarinnar í Noregi. Myndbandið er hluti af árlegu herferð barnastöðvarinnar NRK Super sem miðar að því efla vináttu og samstöðu á meðal barna og ungmenna.

„Þetta átak er  eitthvað sem RÚV mætti alveg taka sér til fyrirmyndar,“ segir Sverrir Kristjánsson, faðir Önnu í samtali við DV.is  en átakið sem um ræðir ber nafnið BlimE og hefur það á undanförnum skipað sér fastan sess á meðal Norðmanna.

„NRK Super, sem er barnastöð NRK gefur á hverju ári út lag undir merkinu BlimE eða “Vertu með” með mikilli viðhöfn. Það er alltaf sama þema; að sporna við einelti og er alltaf einhver þjóðþekktur tónlistarmaður/kona sem flytur lagið. Á hverju ári er líka gert tónlistarmyndband og í ár lék Anna aðalhlutverkið í því.

Konseptið í kringum BlimE er svo auðvitað miklu stærra, en útgáfa myndbandsins er svo sannarlega stór hluti þess,“ segir Sverrir jafnframt.

„Þetta er virkilega flott átak sem er mjög áberandi á hverju ári og auðvitað ótrúlega skemmtilegt fyrir Önnu að spila svo stórt hlutverk í því. Við erum að deyja úr stolti.“