Ólafur F. Magnússon, læknir, tónlistarmaður og fyrrverandi borgarstjóri, hefur gefið út nýtt lag. Lagið sem um ræðir heitir Ástarljóð og segir Ólafur að það hafi orðið til í tveimur áföngum, í byrjun ársins 2017 og byrjun þessa árs.

„Þó að ég sé höfundurinn, þá hefur Vilhjálmur Guðjónsson komið að málum frá upphafi. A kaflinn frá 2017 var fyrir karlrödd og 3 erindi, en þörf þótti á B kafla fyrir kvenrödd, sem einnig væri 3 erindi og mótsvaraði að innihaldi A kaflanum,“ segir Ólafur en athygli vekur að Vilhjálmur leikur á tíu hljóðfæri í laginu.

„Lagið hefur smám saman orðið viðameira, dýpra og fallegra, í vinnunni við það undanfarna 9 mánuði,“ segir Ólafur en Vilhjálmur leikur á píanó, gítara, kontrabassa, víbrafón, flautu, óbó, enskt horn, strengi, klukkuspil og hörpu.

Ólafur hefur notið góðrar aðstoðar annarra söngvara í mörgum lögum sínum og í nýja laginu syngur Guðlaug Dröfn Ólafsdóttir á móti honum.

„Guðlaug kemur fram sem nútímakona af bestu gerð, frjáls í fasi og með sólgleraugu. Hún lét sem vind um eyru þjóta óskir mínar um að hún kæmi fram eins og sveitastelpa frá 19. öld. Lag og ljóð gæti hins vegar samræmst þeim tíðaranda, þannig að myndbandið er mótsagnakennt hvað þetta varðar og húmor í þessu öllu saman,“ segir Ólafur sem bætir við að lokum:

„Ég vona að sú mikla einlægni, rómantík og málrækt, sem er að finna í ljóði, lagi og myndbandi, skili sér til áhorfenda og hlustenda.“