Hinsegin dagar hefjast á hádegi í dag þegar stjórn Hinsegin daga mun, ásamt Degi B. Eggertssyni borgarstjóra, mála fyrstu rendur hinseginfánans á Skólavörðustíg.
Þetta er annað árið í röð sem Skólavörðustígur er prýddur fánanum, en hefð hefur skapast fyrir því að mála eitthvað kennileiti borgarinnar fánanum. Áður hafa tröppur Menntaskólans í Reykjavík og heimreið ráðhúss Reykjavíkurborgar prýtt hinn litríka fána.
Eftir að Dagur og stjórn daganna hafa málað hinar táknrænu fyrstu gleðirendur er gestum og gangandi frjálst að taka sér málningarbursta í hendi og mála Skólavörðustíginn frá gatnamótum hans við Bergstaðastræti og að Laugavegi.
Hinsegin dagar hafa verið haldnir árlega frá árinu 1999 og standa þeir yfir frá 7. til 12. ágúst. Dagskráin er fjölbreytt að vanda og má þar nefna sögusýningu, tónleika, dragsýningu og uppistand, en í heildina eru viðburðirnir rúmlega 30 talsins.
Dagarnir ná hápunkti sínum með gleðigöngunni víðfrægu og útihátíð á laugardaginn næstkomandi. Gleðigangan fer að þessu sinni frá Hörpu að Hljómskálagarðinum, þar sem útihátíðin fer fram. Á undanförnum árum hafa 70 til 100 þúsund gestir tekið þátt í gleðinni og búast skipuleggjendur við miklum mannfjölda í ár.
Dagskrá Hinsegin daga má finna hér.
