Stefnumótaforritið Tinder nýtur mikilla vinsælda en svo virðist sem ekki noti það allir til að komast í rómantísk kynni. Hafþór Gerhardt Hermóðsson er 32 ára gamall, einhleypur rafvirki sem hefur nóg að gera. Eðlilega fer hann ekki á Tinder til að finna sér vinnu heldur til að komast í kynni við hitt kynið. Hafþór skrifar eftirfarandi færslu um nýlega reynslu sína af stefnumótaforritinu:
„Matchaði“ við stelpu á Tinder rétt áðan. Hún: „Hæ. Ég er sko gift en vantar svo mikið rafvirkja til að laga hjá mér innstungu.“ Ég: Les skilaboðin og „unmatcha“ um leið. Sorglega staðreyndin er samt sú að þetta er ekki fyrsta skiptið. Er í alvöru svona erfitt að fá iðnaðarmenn?
Í samtali við DV staðfestir Hafþór að hann hafi lent í viðlíka áður og hann þekki aðra iðnaðarmenn sem verði fyrir þessari reynslu, sérstaklega pípara. Að sögn Hafþórs er engin af þessum konum í leit að stefnumóti:
„Þetta er bara leit að iðnaðarmönnum. Flestar í sambandi nú þegar, sumar af þeim giftar og einn pípari lenti á lesbíu sem vantaði pípara,“ segir Hafþór. Rétt er að taka fram að ekki er hægt að panta þjónustu hans sem rafvirkja á Tinder en hann er opinn fyrir stefnumótum.