Sala á hefðbundum farsímum jókst um 5 prósent á heimsvísu á seinasta ári. Sala á snjallsímum jókst hins vegar aðeins um 2 prósent. Þetta kemur fram á vef Sky News. Þetta þykir benda til þess að fólk sé orðið þreytt á því að vera sífellt háð netinu og samfélagsmiðlum. Rannsóknir hafa sýnt fram á að meðalmanneskjan skoðar símann sinn á 12 mínútna fresti.
Í samtali við RÚV í janúar 2016 sagði Eyjólfur Örn Jónsson sálfræðingur að snjallsímafíkn hefði aukist mikið á síðustu árum, og væri framlenging af netfíkn. Sagði hann mun algengara nú að fólk leitaði hjálpar hjá honum vegna snjallsímafíknar og dæmi væru um að fólk losaði sig við snjallsímana til að losna við endalaust áreiti.
Benti Eyjólfur Örn jafnframt á að snjallsímar væru streituvaldandi, eign þeirra fylgurkrafa um að fólk alltaf í sambandi og alltaf hægt að ná í það; hvort sem er í gegnum samskiptamiðla eða síma. Þá benti hann á að með snjallsímunum hefur internetið orðið miklu aðgengilegra en það var. Fólk getur nú óhindrað komist á netið í tíma og ótíma.
„Það er þó ekki tæknin sem gerir okkur veik, það eru alltaf undirliggjandi ástæður fyrir þessu öllu. Þetta er flóttaleið,“ sagði Eyjólfur jafnframt.
Einfaldara líf
Mary Erskine frá Twickenham er ein þeirra sem er rætt er við í tengslum við umrædda frétt Sky News en hún henti snjallsímanum sínum á dögunum og fékk sér í staðinn einfaldan farsíma sem hún notar eingöngu til að hringa og taka við símtölum.
„Ég bara þoldi ekki hvað ég var sífellt að hanga í símanum allan daginn,“ segir hún og bætir við að vinur hennar hafi tjáð henni að hún skoðaði símann sinn 150 sinnum á dag. Þá bætir hún við að það hafi einfaldað líf hennar mikið að vera ekki endalaust að skoða samfélagsmiðla í símanum, og rjúka til í hvert sinn sem hún fékk áminningu.