Því miður varir ástin ekki að eilífu og hvort sem fólk kýs að horfast í augu við það eða ekki þá endar eitt af hverjum þremur hjónaböndum með skilnaði. Ástæðurnar fyrir skilnaðinum geta verið margvíslegar líkt og sjá má á niðurstöðum könnunnar sem Next Love stefnumótaþjónustan birti nýlega á heimasíðu sinni en umrædd stefnumótaþjónusta  er sérstaklega ætluð einstæðum foreldrum og fráskildum einstaklingum.

Könnunin var lögð fyrir fráskildar konur en alls tóku  43 þúsund konur þátt. Voru þær spurðar að því hver væri helsta ástæðan fyrir því að þær sóttu um skilnað frá maka sínum.

Ástæðan sem flestar nefndu var sú að þær höfðu ekki sömu markmið í lífinu og maki sinn. Næstflestar, eða 29,2 prósent þáttakenda nefndu framhjáhald.

10,9 prósent sögðu ástæðuna hafa verið stöðut rifrildi, tuð og nöldur. Í fjórða sæti á listanum er síðan skortur á nánd.

Sigurd Vedal, eigandi Next Love síðunnar segir að ástæða númer eitt á listanum, skortur á sameiginlegum markmiðum, geti oftar en ekki leitt til ástæðu númer tvö: framhjáhalds.

„Þó svo að framhjáhald geti í sumum tilfellum bjargað hjónaböndum, þá er það einnig ástæðan fyrir því að fjölmörg hjónabönd fara í vaskinn.“

5,6 prósent þáttakenda nefndu geðræn veikindi  sem ástæðuna fyrir skilnaðinum, enda fylgir því oft mikið álag að vera í sambandi við manneskju sem glímir við andleg veikindi, og ekki öll sambönd sem lifa slíkt af, þrátt fyrir að viljinn sé til staðar.

5 prósent nefndu síðan að ástæðan hefði verið sú að makinn sýndi af sér einhvers konar óásættanlega hegðun, til að mynda með andlegu ofbeldi eða gáleysi í fjármálum.Þá sögðu 4,2 prósent þáttakenda að ástæða þess að þær sóttu um skilnað hefði einfaldlega verið sú að þær voru orðnar leiðar á hjónabandinu.

Í áttunda sæti á listanum er líkamlegt ofbeldi af hálfu makans og þá eru vandamál tengd heimilishaldinu og næstneðsta sæti. Fjárhagsvandræði trónir síðan neðst á listanum.