Þó að Tom Cruise sé orðinn 56 ára er hann enn í fullu fjöri eins og nýjasta mynd kappans, Mission: Impossible – Fallout, sýnir. Myndin trónir á toppi vinsældalistans í Bandaríkjunum og þénaði 92 milljónir dala fyrstu sýningarhelgina. Býsna gott það.
En hvað er það sem gerir myndirnar hans Cruise svona eftirsóknarverðar? Er það hasarinn, frábær leikur eða vel tímasettir fimmaurabrandarar? Nei, ekki aldeilis því samkvæmt lauslegri rannsókn Rotten Tomatoes eru það hlaupin sem gera myndirnar hans eftirsóknarverðar. Já, þið lásuð rétt. Eftir því sem Tom Cruise hleypur meira í myndum sínum, þeim mun betur gengur þeim í kvikmyndahúsum.
Independent fjallaði um þetta.
Í þeim rúmlega 40 myndum sem Cruise hefur leikið tekur hann yfirleitt minnst einn sprett. Eftir því sem sprettirnir eru fleiri, þeim mun fleiri miðar seljast á myndina.
Mest hefur Cruise, eða kannski persónan sem hann leikur, hlaupið í myndinni Mission: Impossible III sem kom út árið 2006. Þar sást hann hlaupa tæplega einn kílómetra. Skammt á eftir kemur myndin Mission: Impossible – Ghost Protocol þar sem hann var með um 900 metra. Báðum þessum myndum gekk býsna vel í kvikmyndahúsum. Eina undantekningin frá þessari reglu eru myndirnar Jack Reacher: Never Go Back og The Mummy.
Býsna skemmtileg staðreynd sem þó er varla byggð á traustum grunni vísindalegra staðreynda.