Klámmyndaleikkonan fyrrverandi Mia Khalifa hefur fundið ástina í örmum sænska kokksins Robert Sandberg. Khalifa þessi var um tíma ein allra vinsælasta klámmyndaleikkona heims en hún sagði skilið við fagið eftir að hafa fengið yfir sig holskeflu líflátshótana árið 2015.
BT í Danmörku greinir frá því að Khalifa og Sandberg, sem er vinsæll kokkur í Danmörku, hafi fellt hugi saman fyrir skemmstu. Sandberg er yfirkokkur Michelin-staðarins Kong Hans Kælder sem er einn sá vinsælasti í Kaupmannahöfn.
„Ég rakst á hann á Instagram og byrjaði að fylgja honum. Svo fórum við að skrifast á og ég fór til Kaupmannahafnar þar sem ég hitti hann,“ segir hún við BT.
Að undanförnu hefur Khalifa birt myndir af þeim saman á heimaslóðum hennar í Austin í Bandaríkjunum. Þau ætla að vera í fjarsambandi þar til annað kemur í ljós enda hafa þau bæði skyldum að gegna, Robert í Danmörku og Khalifa í Bandaríkjunum.