Þann 3. júlí 1983 birtist grein í Morgunblaðinu í tilefni af því að 10 ár voru liðin frá goslokum í Heimaey. Þar er meðal annars birt mynd af tveimur börnum að dansa. Í myndatexta segir: 10 ár á milli, Brosað gegnum tíðina.
„Eftir mikla leit fundum við út hver er annað barnið á myndinni, en það er hún Anna Lilja Sigurðardóttir, sem er til hægri, þá þriggja vetra barn, en nú 13 vetra mær, og það er bjart yfir henni eins og vera ber.“
Myndina tók Sigurgeir Jónasson ljósmyndari í Vestmannaeyjum, en hann tók tugþúsundir mynda á gosárinu. Myndin af Önnu Lilju og dansfélaga hennar er tekin á Þjóðhátíð Vestmannaeyja í Klaufinni sumarið 1973.
„Sigurgeir reyndi að komast að því hver var með mér en það tókst ekki,“ segir Anna Lilja í samtali við DV. „Þetta er auðvitað löngu fyrir samfélagsmiðla, þannig að kannski er meiri séns núna.“
Anna Lilja er fædd árið 1970, fædd og uppalin í Vestmannaeyjum og býr þar í dag. Hún segir að samkvæmt Sigurgeiri sé myndin tekin á þjóðhátíð 1973 úti á Breiðabakka. „Hún var haldin þar til 1976, þannig að mögulega er myndin af einhverri þessara hátíða. En ég veit ekki. Ég veit ekkert um þetta barn, því þetta gæti auðvitað alveg verið drengur. Mamma man ekki eftir þessu.“
Anna Lilja setti myndina á Facebook í fyrra fyrir Þjóðhátíð. „Bara til gamans til þess að sjá hvort það kannaðist einhver við barnið. Það komu auðvitað margar ábendingar, en ekki sú rétta.“
Anna Lilja er eins og áður segir barnið hægra megin í röndóttu peysunni. Ef þú ert hitt barnið á myndinni, eða kannast við það, þá máttu endilega senda okkur ábendingu á ragna@dv.is.
Hjálpum Önnu Lilju að finna dansfélagann 45 árum síðar.