Þorvaldur Davíð Kristjánssson leikari er meðal þeirra sem sóttu um stöðu bæjarstjóra Seyðisfjarðar. 11 aðrir sóttu um stöðuna. Þorvaldur Davíð hefur fyrir löngu stimplað sig inn í hug og hjörtu þjóðarinnar með afrekum sínum á sviði leiklistarinnar en hann hefur farið með fjölmörg burðarhlutverk í leikhúsi og kvikmyndum á undanförnum árum.
Greint er frá þessu á vef Austurfréttar. Alls sóttu fjórar konur og átta karlar um stöðu bæjarstjóra Seyðisfjarðakaupstaðar en umsóknarfrestur rann út síðastliðinn föstudag. Vilhjálmur Jónsson, oddviti Framsóknarflokksins í bæjarstjórn hefur gengt starfinu frá árinu 2011.
Þorvaldur Davíð er útskrifaður leikari frá Juilliard listaháskólanum í New York. Hefur hann farið með fjölmörg hlutverk, meðal annars í uppsetningum Þjóðleikhússins og Borgarleikhússins. Þá lék hann aðalhlutverkið í kvikmyndunum Svartur á leik og Vonarstræti sem og aukahlutverk í Dracula Untold og Ég man þig, sem byggð er á samnefndri bók Yrsu Sigurðardóttur. Þá fer hann með hlutverk í kvikmyndinni Svaninum, sem byggð er á bók Guðbergs Bergssonar.
Eftirfarandi sóttu um starf bæjarstjóra Seyðisfjarðar:
Aðalheiður Borgþórsdóttir, verkefnastjóri, Seyðisfirði
Arnbjörg Sveinsdóttir, framkvæmdastjóri, Seyðisfirði
Gísli Halldór Halldórsson, fyrrverandi bæjarstjóri, Ísafirði
Guðrún Lilja Magnúsdóttir, framleiðandi, Egilsstöðum
Jóhann Freyr Aðalsteinsson, tollasérfræðingur, Osló, Noregi
Jón Kristinn Jónsson, sölu- og markaðsráðgjafi, Hafnarfirði
Kristín Amalía Atladóttir, framkvæmdastjóri, Egilsstöðum
Ólafur Hr. Sigurðsson, kennari og fyrrverandi bæjarstjóri Seyðisfirði
Snorri Emilsson, leikstjóri, Seyðisfirði
Sveinn Enok Jóhannsson, sölustjóri og söngvari, Reykjanesbæ
Tryggvi Harðarson, fyrrverandi bæjarstjóri, Reykjavík
Þorvaldur Davíð Kristjánsson, leikari, Reykjavík