Leikarinn Ólafur Darri Ólafsson mun hlaupa í Reykjavíkurmaraþoni Íslandsbanka til styrktar AHC samtakanna, eða Sunnu Valdísi Sigurðardóttur rétt til tekið.
Sunna er 12 ára stúlka með sjaldgæfan taugasjúkdóm sem heitir AHC (Alternating Hemiplegia of Childhood), sem lýsir sér sem stökkbreyting í genum. Færri en þúsund manns í heiminum hafa greinst með þennan sjúkdóm. Sunna er greindarskert, með athyglisbrest og hefur hvorki fullan hreyfiþroska né talþroska. Einkenni AHC eru meðal annars lömunarköst en lækning við AHC myndi koma til með að hjálpa milljónum manna með aðra taugasjúkdóma.
Samkvæmt heimildarmyndinni Human Timebombs, sem fjallar um sjúkdóminn og Sunnu Valdísi, hafa lyfjafyrirtækin ekki viljað taka þátt í þróun lyfja við sjúkdóminum í ljósi þess hversu sjaldgæfur hann er.
„Allir stórir hlutir eiga sér lítið upphaf,“ segir Ólafur Darri á Twitter og vísar á styrktarsíðu sína þar sem fólki gefst kostur að styrkja leikarann og Sunnu um 1000, 2000 eða 5000 kr.
Ólafur Darri hefur stutt Sunnu í áraraðir og áður hlaupið til styrktar henni í Reykjavíkurmaraþoninu. Markmið leikarans í ár er að safna tveimur milljónum króna í þeirri von að hægt sé að þróa lyf eða lækningu við sjúkdómnum.
Reykjavíkurmaraþonið fer fram laugardaginn 18. ágúst.