Guðmundur Ingi Þorvaldsson er einn þeirra fjölda leikara sem tekur þátt í nýju herferðinni fyrir Reykjavíkur Maraþon Íslandsbanka. Ætlar Guðmundur að styrkja Blátt áfram sem er félag sem vinnur að forvörnum gegn kynferðislegu ofbeldi á börnum. Herferð Íslandsbanka hefur vakið mikla athygli frá því að hún var frumsýnd. Í nýrri auglýsingu fyrir herferðina er Guðmundur Ingi í hlutverki bankaræningja. Um auglýsinguna segir Guðmundur Ingi:

„Persónan sem ég leik er ofsalega góður faðir í fjárhagsvandræðum og ákveður að redda því í eitt skipti fyrir öll. Það fer ekki vel.“

Í auglýsingum fyrir maraþonið má sjá hina ýmsu íslenska leikara „á hlaupum“ við hinar ýmsu aðstæður. Hafa leikararnir sagt, þá meira í gamni en alvöru að þeir hlaupi nánast aldrei nema í vinnunni. Guðmundur Ingi leikur ekki aðeins úi auglýsingunni, heldur ætlar hann eins og kemur fram hér að ofan að hlaupa hálfmaraþon til styrktar Blátt áfram. Þá má geta þess að leikararnir fá ekki greitt fyrir að koma fram í auglýsingunum. Þá tekur Íslandsbanki á sig allan umsýslukostnað af áheitasöfnun allra hlauparanna í ár og þar með talið leikarahópsins. Þannig er tryggt að hver eins og einasta króna skilar sér beint til viðkomandi málefnis.

Hér má sjá myndskeið um gerð auglýsingarinnar.