Ragga Hólm er næsti þátttakandi Í Takt við tímann á vef DV. Hún spreytir sig á þeirri áskorun að semja lag frá grunni á aðeins tíu mínútum.  Jói Pé, Króli og Þormóður Eiríksson og Daði Freyr Pétursson hafa áður tekið áskoruninni. Ragga Hólm hefur getið sér gott orð sem plötusnúður og útvarpsmaður. Þá þykir hún afar hæfileikaríkur rappari. Ragga naut aðstoðar BLKPRTY við gerð lagsins.

Frumraun hennar í rappi var árið 2017 með Reykjavíkurdætrum og var hún í kjölfarið tekin inn í hljómsveitina. Hefur sú öfluga rappsveit sem eingöngu er skipuð konum ferðast um Evrópu og hafa spilað fyrir hátt í tuttugu þúsund manns. Ragga fékk einnig góðar viðtökur á Secret Solstice.

Þá sameinuðu þau krafta sína Ragga Hólm og Kiló. Í kjölfarið ákvað Ragga að gefa út plötu og má segja að sólóferilinn sé hafinn af fullum þunga. Þá er von á plötu frá Reykjavíkurdætrum og verður gefið út lag í næstu viku. Í samtali við DV kveðst Ragga afar spennt fyrir framtíðinni.

Þá mæta Ragga Hólm og Kilo í höfuðstöðvar DV á morgun og taka nokkur lög í beinni útsendingu í DV sjónvarp og verður sent út á netinu og á Facebook. Það er atburður sem enginn tónlistarunnandi ætti að missa af.