Tónleikaferðin byrjar 17. júlí og planið er að stoppa á fjórtán stöðum á sextán dötum. Í för með Ásgeiri verður Júlíus, gítarleikari og bakraddasöngvari og ætla þeir að spila á sitthvorn kassagítarinn. Þetta er eitthvað sem þeir hafa oft gert áður en aldrei á eiginlegri tónleikaferð.
„Ég fékk þessa hugmynd fyrir nokkrum vikum – mig langaði í raun bara að prófa þetta, Þetta „format“ af túrum – þetta er svolítið öðruvísi þarna úti þegar við förum með allt bandið. Þá er þetta meira svona „show“ og við spilum á stærri stöðum. Mig langaði til að taka minni staði og vera nær fólkinu,“ segir Ásgeir Trausti í viðtali við Vísi í morgun og bætir við að nú sé plata einnig væntanleg snemma á næsta ári.
„Við erum búnir að vera að vinna í henni alveg frá ársbyrjun í rauninni og erum komnir svolítið á leið með hana – ég held að sumarið farið svolítið í að vinna að henni. Við ætlum þá líka að nýta þessa ferð í að kynna þau lög svona sem fyrsta „build up“ að þessari plötu,“ segir Ásgeir og nú getið þið á landsbyggðinni byrjað láta ykkur hlakka til.