Margir halda að Prima sé innflutt krydd en svo er aldeilis ekki, hér er um að ræða alíslenska framleiðslu frá hinu rótgróna fyrirtæki Vilko, sem stofnað var í Kópavogi árið 1969 en hefur allt frá árinu 1986 verið starfandi á Blönduósi. Nýlega urðu tímamót í starfseminni er Vilko flutti sig um set innan Blönduóss:
„Við fórum úr 600 fermetrum í 1.400 fermetra og við það sköpuðust nýir möguleikar,“ segir Gunnar Tryggvi Halldórsson, gæðastjóri Vilko, en framleiðsluvélar fyrirtækisins hafa verið endurnýjaðar:
„Nýja framleiðslulínan okkar er hraðvirkari og afkastameiri og gefur til dæmis möguleika á að þróa innri og ytri innsigli á umbúðum, þannig að núna getum við auk innsiglis á tappanum sjálfum haft hulsu utan um tappann á grillglösunum,“ segir Gunnar og bætir því við að Vilko hafi nú fengið lífræna vottun á framleiðslulínunni:
„Þetta gefur okkur meiri möguleika á að framleiða lífrænar vörur og við erum að vinna í því að koma frá okkur nýrri línu af Prima-kryddum sem verður að fullu lífræn.“
„Við fáum mikla svörun á samfélagsmiðlum, til dæmis eru snapparar duglegir að prófa sig áfram með vörurnar og gefa þeim umsagnir,“ segir Gunnar en þekkt dæmi eru um að nýjungar hafi orðið til í þessari gerjun hjá snöppurunum.
Eitt dæmi er notkun á Prima steikar- og grillkryddi með hvítlauk sem er mjög vinsælt í grillsósur og ídýfur. Annað skemmtilegt dæmi snertir hið þekkta Vilko vöffludeig en sú hugmynd að grilla vöfflurnar varð til á snappinu og hefur síðan orðið mjög útbreidd.
„Samfélagsmiðlarnir veita okkur gott aðhald og við tökum öllum ábendingum fagnandi. Facebook-síðan okkar er með 4.000 fylgjendur sem eru ófeimnir við að segja okkur frá því ef tilteknar vörur vantar í einhverjar búðir, hvort þeim líkar eða líkar ekki tiltekið krydd og svo framvegis. Við bregðumst vel við öllum ábendingum og Facebook-síðan er eiginlega meira þjónustuvettvangur en auglýsingatæki. Eitt afar skemmtilegt dæmi um þessa grósku er þegar við spurðum á Facebook-síðunni hvaða krydd fólk notaði á samlokur og við fengum 300 svör. Þarna fengum við 300 uppskriftir að samlokum,“ segir Gunnar.
Sem fyrr segir er Prima-kryddið íslensk framleiðsla frá a til ö, framleitt í fyrirtæki á landsbyggðinni, en keypt og notað um allt land. Nánari upplýsingar er að finna á vefsíðunni prima.is (eða vilko.is) og Facebook-síðunni www.facebook.com/Primakrydd/