Ferðamáladeild Háskólans á Hólum býður upp á háskólanám í ferðamálafræðum, viðburðastjórnun og stjórnun ferðaþjónustu og móttöku gesta. Markmið námsins er að undirbúa nemendur fyrir fjölbreytt störf í ferðaþjónustu og viðburðastjórnun. Nemendur geti tekið virkan þátt í þróun ferðaþjónustu á Íslandi ásamt því að gegna stjórnunar- og ábyrgðarstörfum. Nemendur verði einnig færir um að stofna ný fyrirtæki og skipuleggja og útfæra viðburði frá upphafi til enda. Námið er því í senn hagnýtt, fræðilegt og fjölbreytt.

Mikil áhersla er lögð á verknám sem hluta af námsleiðum á grunnstigi með samstarfi við fyrirtæki í greininni víðsvegar um landið. Með markvissu skipulagi verknámsins er leitast við að tryggja nemandanum góða starfsreynslu á verknámstímanum og að fyrirtækin sjái sér einnig hag í því að taka til sín verknámsnema, sem gjarnan færir með sér nýja strauma hugmynda og þekkingar í ferðamálum. Í gegnum verknám og gestakennslu kynnast nemendur atvinnurekendum í ferðaþjónustu og skapa tengsl sem nýtast þegar komið er út í atvinnulífið að námi loknu.

Rannsóknir deildarinnar snúa að fjölbreyttum viðfangsefnum ferðamálafræða og viðburðastjórnunar. Má þar nefna efnahagsleg áhrif ferðaþjónustu, upplifun ferðamanna, samfélagsleg áhrif og félagsleg þolmörk ferðaþjónustu, nýsköpun og vöruþróun, og starfsumhverfi í ferðaþjónustu og tengdum greinum.

Í dag er boðið upp á fimm námsleiðir í Ferðamáladeild Háskólans á Hólum:

• Diplómanám í ferðaþjónustu dreifbýlis (e. Rural Tourism) sem er eins árs nám á háskólastigi, með möguleika á að halda áfram inn á annað ár til BA gráðu í ferðamálafræðum
• Diplóma í viðburðastjórnun (e. Event Management) sem er eins árs nám á háskólastigi. Hér er einnig möguleiki á að halda áfram í BA nám í ferðamálafræðum
• BA nám í ferðamálafræðum (e. Tourism Studies)
• BA nám í stjórnun ferðaþjónustu og mótttöku gesta (e. Tourism and Hospitality Management)
• Rannsóknartengt meistaranám í ferðamálafræðum

Nánari upplýsingar á vefsvæði Háskólans á Hólum, www.holar.is