Vefskólinn er nýleg námsbraut innan Tækniskólans sem býður upp á nám sem er í senn mjög skapandi og afar hagnýtt. Jónatan Arnar Örlygsson er verkefnastjóri hjá Vefskólanum og segir hann námið bjóða upp á kunnáttu sem er mikil þörf á í atvinnulífinu:

„Nemendur fá kennslu á breiðu sviði um allt sem kemur að þróun veflausna. Þeir fá kennslu í vefforritun og er áhersla lögð á framendaforritun, öllu því sem er sýnilegt notendum. Við erum t.d. með kúrsa í vefhönnun, notendaupplifun, frumkvöðlafræði og verkefnastjórnun. Allt gagnast þetta við gerð vefsíðna, vef-appa og hvers konar útgáfur af því sem við eigum í gagnvirkum tengslum við á internetinu í dag. Við útskrifum góða framendaforritara sem hafa gott auga fyrir útliti. Aðrir nemendur sérhæfa sig að námi loknu í vefhönnun.“

Námið veitir mikla atvinnumöguleika. Stúdentspróf þarf til að fá inngöngu í Vefskólann og einnig er einhver bakgrunnur í annað hvort grafískri hönnun eða forritun mikill kostur. „Almennt er góð tölvukunnátta nauðsynleg en einnig þurfa nemendur að vera mjög skapandi í náminu og hafa gott auga fyrir útliti. Mikilvægt er að lausnir sem búnar eru til á vefnum séu notendavænar og einfaldar,“ segir Jónatan.

Helstu upplýsingar um nám í Vefskólanum:

• Vefskólinn er 2ja ára nám með sérhæfingu á viðmótsforritun. Nemendum gefst kostur á að læra m.a vefhönnun, viðmótsforritun, verkefnastjórnun og frumkvöðlafræði.
• Námskráin var byggð upp með aðstoð atvinnulífsins með það að markmiði að kenna leikni sem er mikil eftirspurn eftir á atvinnumarkaðnum.
• Námið er eina námið sinnar tegundar á Íslandi.
• Vefskólinn vinnur náið með atvinnulífinu og fær fjölda gestakennara til sín.
• Nemendur eiga þess kost að taka 3 annir til viðbótar í Copenhagen School of Design and Technology til að ljúka BA-gráðu.
• Nemendur sem stundað hafa nám í Vefskólanum starfa nú í dag hjá mörgum af flottustu tæknifyrirtækjum landsins.
• Námið er verkefnadrifið þar sem sköpunarkraftur einstaklingsins fær að njóta sín. Mikið er lagt upp úr hópavinnu og þjálfun í að vinna með öðrum.
• Námið er byggt á fyrirlestrum og kennslu en mikil áhersla er lögð á verkefnavinnu og að nemendur hafi greiðan aðgang að kennurum.
• Nemendur Vefskólans fengu tvær tilnefningar á Íslensku vefverðlaununum sem haldin var í Hörpu í janúar 2018 af Samtökum Vefiðnaðarins.

Nánari upplýsingar og innritun á www.tskoli.is