Rokkarinn, gleðigjafinn, íslenskuseníið og prófarkalesarinn Atli Steinn Guðmundsson hefur verið búsettur í Noregi, ásamt konu sinni, Rósu Lind Björnsdóttur, frá því í maí árið 2010. Atli Steinn sem er með þrjár háskólagráður vinnur í fullu starfi hjá AGA gasframleiðandanum og í hlutastarfi sem prófarkalesari hjá Morgunblaðinu, auk þess sem hann skrifar líka af og til fréttir frá Noregi.

Þannig viðheldur hann meðal annars íslenskunni og tengslunum við Ísland. Atli Steinn er líka  einstaklega minnugur og rifjar ítrekað upp á Facebooksíðu sinni, sér sjálfum og vinum hans til skemmtunar, ýmsa atburði sem á daga hans hafa drifið. Í nýjustu Facebookfærslu hans varar hann fólk þó við hvað það setji á Facebook, því þá geta hlutirnir svo sannarlega farið að gerast.

Í maí í fyrra státaði Atli Steinn sig af því að vera loksins kominn með að láni nýjustu bók norska rithöfundarins Jan Erik Fjell, eftir að hafa beðið lengi eftir henni á bókasafninu. Lofaði hann bókina og sagði það verk fyrir íslenska útgefendur að ná samningum við Fjell og þýða bókina. Það var akkúrat það sem gerðist, Björt bókaútgáfa samdi við Fjell og bauð Atla Steini að þýða bókina.

Tæpu ári síðar og ómældum vinnustundum ofan á vinnu og aukavinnu og allt er bókin komin út og skellti Atli Steinn að sjálfsögðu í veglega og fróða Facebookfærslu um málið.

Vert er að geta þess að bókin er fimmta bók Fjell og því hlýtur að liggja beinast við að Atli Steinn fari í að þýða hinar fjórar.