Ólafur gekkst undir magaermiaðgerð á liðnu ári en í aðgerðinni voru um 80 prósent af maganum fjarlægð. Ólafur ræddi þetta í Magasíninu á útvarpsstöðinni K100 í gær.
Ólafur sagði að aðdragandinn að aðgerðinni hafi verið langur og hann hafi talað við fjölda sérfræðinga áður en hann tók ákvörðun um að fara í aðgerðina. Hann kvaðst hafa verið tilbúinn að snúa við blaðinu enda er það eitt af skilyrðum þess að fá að gangast undir slíka aðgerð.
„Mér hefur aldrei liðið betur. Ég man hreinlega ekki eftir að mér hafi liðið betur en mér líður í dag,“ sagði Ólafur í viðtalinu.
Hann kveðst meðvitaður um það að hugarfarsbreyting sé nauðsynleg til að fylgja eftir árangri aðgerðarinnar. „Það er ekki þannig að það sé einhver lífstíðarábyrgð á því að menn komi sér ekki í einhverjar ógöngur aftur. En það þarf eindreginn brotavilja til þess. Og maður fær tækifæri. Menn sem eru orðnir svona feitabollur eins og ég var orðinn, þeir fá tækifæri til að snúa við blaðinu og verða svona eins og venjulegt fólk á nýjan leik.“
