Guðni Ágústsson, fyrrverandi alþingismaður og ráðherra, hvetur karla til að hætta að hugsa eins og kjánar og hætta að segja: „Það kemur ekkert fyrir mig“. Tilefnið er heimsókn Guðna til sérfræðings í maga- og ristilspeglun fyrir skemmstu.
Guðni fjallar um þetta í aðsendri grein í Morgunblaðinu í dag.
Í grein sinni, sem ber yfirskriftina Karlinn þarf ekki síður en bíllinn í læknisskoðun, segir Guðni:
„Ekkert skortir á nákvæmni manna að fara með nýja bílinn sinn í fimmtán þúsund kílómetra skoðun og borga fúlgur fjár fyrir. Hins vegar eru margir tregir til að fara sjálfir til læknisins í samskonar fyrirbyggjandi skoðun og þola illa nöldrið í konu sinni eða móður þegar þær eru að minna á að heilsan sé rannsökuð og hjartsláttur bóndans ekkert síður en ganghljóð bílsins.“
Guðni bendir svo á að ekkert hafi fyrirbyggt eða komið í veg fyrir áföll og dauða kvenna eins og regluleg brjóstaskoðun og leit að krabbameini. Hann kveðst hafa farið að ráði Ólafs F. Magnússonar, heimilislæknis og fyrrverandi borgarstjóra, um að fara til Ásgeirs Theódórssonar, læknis í maga- og ristilspeglun í leit að „hinum þögla morðingja“ eins og það er kallað, dulda krabbameinið sem getur gert mikinn óskunda.
„Hann þræddi myndavél um kokið í magann og svo fór hann með hana um ristilinn. Ég beið átekta og spurði: „Að hverju varstu að leita í maganum?“ Hann svaraði: „Að „óvininum“, sem oft býr um sig þar og er „helíkóbaktería“, en hún myndar svo maga- og skeifugarnarsár og síðar oft krabbamein.“ Svo bætti hann við: „En veistu það, ristillinn þinn er hreinn eins og Hvalfjarðargöngin en óvinurinn er kominn í magann.“
Guðni segist svo hafa fengið þau skilaboð frá Ásgeiri að hann myndi koma óvininum fyrir kattarnef. Allt sem til þyrfti væri ein pilla á dag í eina viku. „Það verður átakalaus magahreinsun og þú ert laus við þann arma þræl,“ hefur Guðni eftir Ásgeiri.
Hann segir að þetta hafi allt gengið eftir en svo hafi Ásgeir bætt við: „En veistu að ristilkrabbamein er annað eða þriðja algengasta krabbamein meðal Íslendinga og önnur algengasta dánarorsökin af völdum krabbameins. Flestar þjóðir hafa byrjað skimun eftir þessu krabbameini en ekki við Íslendingar. Þeir eru margir sem koma í svona skoðun ári of seint! Dauðinn hefur heltekið líkamann og dreift sér.“
Guðni segir að fleiri atriðum megi ekki gleyma, svo sem sykursýkinni eða blöðruhálskirtlinum. Staðreyndin sé sú að við erfum kostina frá mæðrum og feðrum okkar en gallana einnig.
„Að lokinni ristilspegluninni gekk ég skjálfandi til gjaldkerans, skoðunin kostaði þá aðeins 10% af því sem 15 þúsund kílómetra skoðunin á bílnum kostaði, en ekki ek ég honum um vegi landsins ef „hinn þögli morðingi“ fær að búa um sig í maga eða ristli.
Þessi grein er skrifuð lífinu og læknisfræðinni til dýrðar og til sona þessa lands að hætta að hugsa eins og kjánar: „Það kemur ekkert fyrir mig!“
Við erum allir jafnir fyrir sjúkdómunum en sumir jafnari en aðrir, munum að: „Illt er í ætt gjarnast.“