Örn Smári er kornungur tónlistarmaður frá Akureyri og gengur hann undir listamannsnafninu DayDream. Hann er aðeins 19 ára og hefur áður gefið út fimm lög. Hatur og ást er hins vegar fyrsta lagið hans á íslensku, en það er að finna í spilaranum hér að neðan. Hin fjögur lögin eru á ensku. Um lagið Hatur og ást og hvernig það varð til segir Örn Smári:
„Lagið snýst um hvernig fjölskyldan mín hefur alltaf verið til staðar fyrir mig, alveg sama hvað.
Hvernig ég hef gengið í gegnum erfið tímabil eins og svo margir aðrir, við eigum öll erfiða daga og góða daga. Að ég náði að draga sjálfan mig upp þrátt fyrir að ég héldi að ég gæti það ekki, ég var fastur i holu þar sem ég sá varla sólina. Þetta er erfið lífssýn, einhvern veginn fattar maður ekki alla góðu hlutina í kringum sig. Það er margt gott við líf mitt, vinirnir, fjölskyldan, skólinn, vinnan og eitt af því mikilvægasta fyrir mér tónlistin. Ég er þakklátur fyrir það fólk sem er náið mér og fyrir að það hefur alltaf stutt mig, jafnvel þegar mér fannst ég varla geta staðið upp úr rúminu.“