Söngvarinn Jón Þór Birgisson, eða Jónsi í Sigur Rós, er á leið heim til Ísland og er tilefnið ærið, eins árs afmælisveisla verslunarinnar Fischer, sem hann rekur ásamt systrum sínum, Ingu, Lilju og Sigurrós. Hljómsveitin er nefnd í höfuð þeirrar síðastnefndu, sem er sú yngsta af systkinunum fjórum.
Fischer er verslun og sýningarrými í gamla Grjótaþorpinu og mikið er lagt upp með að örva skynjanir einstaklingsins.
Afmælisveislan verður haldin laugardaginn 15. desember þar sem mikið verður lagt í að gleðja gesti og gangandi.
„Þetta verður algjört ævintýri og eitthvað að finna fyrir alla. Sérstök partý plata verður gefin út í takmörkuðu upplagi, nýtt ilmkerti kynnt til sögunnar, ný listaverk til sýnis og Fischer kokteilinn gefins ásamt hinu nýja vegan súkkulaði Fischer, hnossgæti,“ segir Lilja. „Og þetta er bara byrjunin. Sin Fang og Kjartan Holm munu spila tónlist og hundurinn Atlas mun kynna nýja umhverfisvæna hunda sjampóið sitt fyrir vandláta hunda.“
Gleðin stendur alla helgina en mun tónleikadagskráin hefjast klukkan 16 á laugardaginn og standa til klukkan 18. Allir eru hjartanlega velkomnir meðan húsrúm leyfir.