Leikarinn Idris Elba hefur verið valinn kynþokkafyllsti karlmaður í heimi í ár af tímaritinu People. Leikarinn, sem er 46 ára, tekur við keflinu af söngvaranum Blake Shelton, sem var valinn í fyrra.
Elba kom fram í þætti Jimmy Fallon í gærkvöldi þar sem valið var tilkynnt, en aðrir sem komu til álita voru meðal annars Chris Pratt, Michael B. Jordan og Jason Momoa.
Elba, sem er staddur í London við tökur, sagði við Fallon: „Mamma verður svo svo stolt.“ Fallon birti einnig forsíðu blaðsins sem mynd af Elba prýðir, en blaðið kemur út 19. nóvember.
Aðspurður um valið segir Elba það hafa komið sér ánægjulega á óvart. „Ég var alveg, í alvörunni. Svo leit ég í spegil og sagði við sjálfan mig: Jú þú ert doldið sexý í dag. En til að vera hreinskilinn þá var þetta bara skemmtilegt. Og kom ánægjulega á óvart og gott fyrir egóið.“
Lífsmottó Elba er að iðrast einskis. „Lífið snýst ekki um að hugsa um hvað þú hefðir getað gert. Ég tel að allir ættu að tileinka sér þá hugsun að morgundagurinn er ekki gefinn, þannig að lifðu fyrir daginn í dag og gerðu það sem þú vilt gera í dag.“