Systkinin Nuseir og Naya Yassin heimsóttu Ísland og áttu ekki til orð yfir kostnaðinum sem í ferðina fór. Nuseir birti myndband á síðunni sinni, Nas Daily, þar sem hann lýsir undrun sinni yfir útgjöldunum. Auk þess lýsir hann því hversu fráleit hugmyndin er að borga fimm dollara (600 ISK) fyrir íslenskt loft í dós.
Þau Nuseir og Naya stöldruðu við á Íslandi í tæpan sólarhring. Naya var með 300 dali inni á bankareikningi sínum, sem samsvara í kringum 36 þúsund krónur. „Þá áttaði hún sig á því að Ísland ætti eftir að gera hana blanka,“ segir Nuseir.
Þá nefna þau rútukostnað, matarkostnað, Bláa lónið og verðlagningu í matvöruverslunum, en þeim blöskrar að verðin þar séu talin eðlileg. „Þess vegna er Ísland með dýrustu löndum í heimi fyrir ferðafólk.“