Fyrir útgáfu nýjustu bókar Arnaldar Indriðasonar, Stúlkan hjá brúnni, fór Forlagið af stað með leik í tilefni þess að fimmhundruðþúsundasta eintak af bókum Arnaldar myndi seljast skömmu eftir dreifingu.
Gullmiða var komið fyrir í einu eintaki af bókinni áður en hún fór í búðir og handhafi miðans skyldi gefa sig fram til Forlagsins. Vinningshafi leiksins var Halldór Sigurðsson frá Þorlákshöfn, en sonur hans gefur honum nýjustu bók Arnaldar ár hvert.
Athöfnin átti sér stað í Pennanum Eymundsson Smáralind þar sem bókin var keypt. Þar afhenti Arnaldur sjálfur Halldóri vinningsumslagið sem innihélt gjafabréf til lúxusgistingar á Tower Suites í Borgartúni, kvöldverðar á Skelfiskmarkaðnum og miða í Þjóðleikhúsið, allt fyrir tvo. Eftir að afhendingunni var lokið áritaði Arnaldur svo eintak af bókinni fyrir Halldór.
Stúlkan hjá brúnni fór beint í fyrsta sæti á Bóksölulistanum 1.-20. nóvember auk þess sem hún hefur fengið frábæra dóma gagnrýnenda.
