Bryan Cranston hefur staðfest að Breaking Bad kvikmynd verður að veruleika, en hann er ekki viss um hvort að Walter White verði í henni.

Það er áratugur síðan sjónvarpsþættirnir Breaking bad hófu göngu sína, en þáttaraðirnar urðu alls fimm og hættu þættirnir í sýningu árið 2013.

Þáttaröðin hefur haldið vinsældum, og öðlast nýja aðdáendur, þökk sé streymisveitum eins og Netflix, og „spin-off“ þáttaröðin Better Call Saul hefur einnig hjálpað til.

Vince Gilligan, aðalframleiðandi og handritshöfundur þáttanna vinnur að því að endurvekja þá í formi 2 klst. langrar kvikmyndar, en ekki hefur verið staðfest hvort hún verði sýnd í kvikmyndahúsum eða aðeins í sjónvarpi.

Það er The Hollywood Reporter, sem sagði fyrst frá þessum gleðifréttum, en myndin mun gerast í sama veruleika og þættirnir og mun að öllum líkindum fókusa á mann sem rænt er og hvernig hann nær að losa sig úr prísundinni.

Ekki er ljóst hvort að stjarna þáttanna, Bryan Cranston, mun verða í kvikmyndinni og ljóst er að leikarinn veit það ekki sjálfur (enn þá allavega).

„Já. Það er verið að vinna að kvikmynd, en ég hef ekki lesið handritið. Ég hef ekki fengið handritið, ekki lesið það, þannig að það er spurning hvort við munum sjá Walter White í kvikmyndinni.“

Þrátt fyrir að vita ekkert um þetta, virðist sem Cranston sé spenntur fyrir þessu öllu saman, líkt og sjá má í neðangreindu viðtali.

Eins og þar kemur fram er Cranston algjörlega til í að endurtaka hlutverk sitt. Aaron Paul mun endurtaka sitt hlutverk sem Jesse Pinkman, sem gefur jafnvel til kynna að hann sé maðurinn sem rænt er vegna fyrri glæpa hans.