Fátt er eins umtalað meðal Pólverja á Íslandi um þessar mundir og furðuleg ljós á himnum sem fjöldi þeirra hefur náð að festa á ljósmynd. Á Facebook er stór hópur þar sem Pólverjar á Íslandi ræða sín á milli, Polacy na Islandii.
Undanfarna daga hafa nokkrir Pólverjar þar deilt myndum af himinhvelfingunni. Á þeim myndum má ýmist sjá nokkurs konar slikju, sem minnir nokkuð á norðurljós, eða einfaldlega ljós á himni. Hér verður ekki reynt að útskýra hvað veldur þessu þó líklegt sé að slikjan sé einfaldlega ljós frá tunglinu að skína bak við ský.
Þeir sem taka þátt í umræðunum eru flestir á einu máli: Að hér sé um að ræða geimverur. Í það minnsta kemur orðið UFO oft fyrir í textanum sem er augljóslega allur á pólsku og því illskiljanlegur. Ekki er þó ólíklegt að sumir séu að grínast. Hvað sem því líður þá er forvitnilegt að svo margir Pólverjar – í það minnsta um tíu manns deila myndum af þessu – hafi séð þessi ljós meðan lítið hefur farið fyrir þessu meðal Íslendinga á samfélagsmiðlum.