Handboltahetjan Ólafur Stefánsson talar tæpitungulaust í nýju viðtali við úrvarpsþáttinn Harmageddon á X-inu. Lætur hann þar meðal annars í ljós skoðanir sínar á skólamálum og uppeldismálum. Segir Ólafur að sköpunargáfa barna sé kæfð í skólum.
Ólafur drepur einnig á samskipti kynjanna og segir að þó að karlmenn geti fengið mikinn stuðning frá konum þá þurfi þeir meira hver á öðrum að halda þegar þeir lenda í miklum erfiðleikum. En ekki síst þurfi menn að finna styrkinn í sjálfum sér.
Ólafur ræðir líka um samband feðga og þar er honum mikið niðri fyrir og talar af ástríðu:
„Knúsaðu strákinn þinn, ertu ekki að grínast, pabbi, knúsaðu strákinn þinn. Ertu ekki að djóka í mér, knúsaðu „effing“ strákinn þinn.“
Ólafur bendir á að strákum í háskólum fari fækkandi og segir: „Hættan er sú að strákar verði of miklir strákar og það verði ekki umræðugrundvöllur milli kynjanna vegna þess að strákar verða að geta tjáð sig.“