fbpx
Þriðjudagur 18.desember 2018
Fókus

Hlutir sem Íslendingar ætluðu að sniðganga en gerðu svo aldrei

Fókus
Laugardaginn 17. nóvember 2018 13:30

Þjóðin reiðist reglulega yfir einhverju hneyksli. Margir láta stór orð falla þegar eitthvað kemur upp og ætla að fylgja því eftir með því að sniðganga eitthvað. Samstillt átak neytenda hefur virkað hér á landi, við sáum það í tilviki Brúneggja og stóra kjötbökumálinu. Reiði almennings hefur þó ekki alltaf borið árangur og oft hefur ákall eftir því að ákveðin vara sé sniðgengin fjarað út á stuttum tíma. DV tók saman nokkur dæmi þar sem árangur var lítill sem enginn.

Stóru bensínstöðvarnar

Sviðsett mynd/DV

Stóru bensínstöðvarnar þrjár, Esso, Skeljungur og Olís, stunduðu ólöglegt verðsamráð á árunum 1993 til loka árs 2001. Rannsókn Samkeppnisstofnunar lauk árið 2004 og segir í þúsund blaðsíðna skýrslu hennar að olíufélögin þrjú hafi „haft með sér yfirgripsmikið og óslitið samráð um verð, markaðsskiptingu og gerð tilboða“. Talið er að olíufélögin hafi hagnast um 6,5 milljarða króna vegna samráðsins. Margir Íslendingar ætluðu aldrei aftur að versla við félögin og greiddi það fyrir komu Atlantsolíu til landsins, flestir gáfust þó fljótt upp og hafa bensínstöðvar félaganna aldrei verið fleiri en nú. Margt hefur þó breyst, Esso heitir nú N1 og Dælan; Skeljungur heitir nú Orkan og það er nánast stöðug röð í bensíndælur Costco í Kauptúni.

 

Sambíóin

Mynd/flickr

Samfélagið ætlaði á hliðina eftir að tvær konur stigu fram vorið 2014 eftir að þær voru reknar úr Sambíóunum eftir að þær tóku þátt í umræðum á netinu um kynjamismunun. Sögðu þær að yfirmenn sínir hefðu úthlutað körlum og konum sérstök störf á vinnustaðnum, en rökin fyrir slíkri hagræðingu voru sú að annað kynið, konur, seldi meira í bíósjoppunni. Í kjölfarið hófst hávær umræða um að sniðganga Sambíóin. Það tók viku fyrir Sambíóin að bregðast formlega við, fram að því hafði neikvæðum athugasemdum verið eytt af samfélagsmiðlum fyrirtækisins og aldrei náðist í stjórnendur. Uppsagnirnar voru að lokum dregnar til baka og konurnar voru beðnar afsökunar, vísaði fyrirtækið á vaktstjóra sem átti að hafa tekið ákvörðunina um vinnufyrirkomulag kynjanna. Í dag muna fáir, ef einhver, eftir því að það hafi átt að sniðganga Sambíóin.

 

Ísrael

Prófaðu að segja orðið „Ísrael“ í næstu fermingarveislu, það eru meiri líkur en minni á að þú munir lenda í rifrildi við einhvern. Fjöldinn allur af Íslendingum vill að við sem þjóð skiptum ekki við Ísrael vegna hertöku á landsvæði Palestínumanna og allra þeirra sem hafa látið lífið á svæðinu á undanförnum árum. Reykjavíkurborg ætlaði um árið að sniðganga allar vörur frá Ísrael en borgin var rekin til baka með það. Voru margir með háværar yfirlýsingar á samfélagsmiðlum um að ætla aldrei aftur að borða Jaffa-appelsínur, setja myntu í mojitoinn sinn eða drekka SodaStream. Það gekk ekki eftir og samkvæmt tölum Hagstofunnar hefur innflutningur á vörum frá Ísrael aukist verulega á síðustu árum.

 

Iðnaðarsalt

Almenningur frussaði út úr sér matnum þegar það frétti að hann gæti innihaldið iðnaðarsalt. Greint var frá því í byrjun árs 2012 að matvælafyrirtæki hefðu í áraraðir notað salt sem ætlað var til iðnaðar og kom þá í ljós að Matvælastofnun hefði vitað af því í tvo mánuði að Ölgerðin hefði selt iðnaðarsalt. Saltið sem um ræðir er nánast alveg eins og annað salt og sögðust fyrirtækin ekki hafa gert sér grein fyrir því að það væri ekki ætlað til manneldis. Sagði forstjóri Ölgerðarinnar þetta vera „aulaleg mistök“. Mikið fjölmiðlafár gaus upp og sögðust margir aldrei ætla að skipta við framleiðendur sem hefðu verið að „eitra“ fyrir þeim með þessum iðnaðarsaltsóþverra. Flestir voru búnir að gleyma þessu í lok mánaðarins.

 

Mjólkursamsalan

Ljósmynd: DV/Hanna

Íslendingar hafa lengi haft óbeit á stórum fyrirtækjum sem hafa yfirburðastöðu á tilteknum markaði, þ.e.a.s. þeir sem hafa ekki beinan hag af því. Sumarið 2016 var Mjólkursamsalan sektuð um 460 milljónir króna vegna alvarlegrar misnotkunar fyrirtækisins á markaðsráðandi stöðu. Stór hluti þjóðarinnar bölvaði fyrirtækinu í sand og ösku við kvöldverðarborðið og ætlaði aldrei aftur að nota MS mjólk í kaffið. MS var sakað um að beinlínis beita sér gegn vörum frá litlum samkeppnisaðilum. Sala á mjólk frá Örnu áttfaldaðist á stuttum tíma. Sniðgangan gekk ekki lengra en svo að í dag eru mjólkurkælar verslana enn stútfullir af vörum frá MS.

 

 

Eurovision

Ísraelska söngkonan Netta sigraði Eurovision í ár. Keppnin fer því fram í Ísrael á næsta ári.

Rúmlega 27 þúsund Íslendingar skrifuðu í vor undir áskorun um að Ísland tæki ekki þátt í Eurovision á næsta ári vegna þess að keppnin verður haldin í Ísrael. Á síðu undirskriftalistans sagði: „í ljósi mann­rétt­inda­brota Ísra­els­rík­is gagn­vart palestínsku þjóðinni er ekki siðferðilega verj­andi að taka þátt í glanskeppni eins og Eurovisi­on í skugga þess of­beld­is sem Ísra­el beit­ir ná­granna sína. Ísra­els­ríki hef­ur á und­an­förn­um mánuðum myrt tugi ein­stak­linga fyr­ir það eitt að mót­mæla ástand­inu.“ Margir listamenn tóku undir áskorunina, þar á meðal Páll Óskar og Daði Freyr. RÚV ætlar að taka þátt þrátt fyrir áskoranirnar og verður að koma í ljós hvort áhorfið verði sambærilegt síðustu árum.

Fókus
Á Fókus finnur þú umfjöllun um fólk, bæði í fréttamolum og styttri og lengri viðtölum, Tímavélina, umfjöllun um menningu: bækur, kvikmyndir og sjónvarp, leiklist, tónlist og tónleika, viðburði,
próf, gjafaleiki og fleira. Ert þú með ábendingar, hugmyndir eða efni fyrir Fókus, upplýsingar um viðburði, eða annað? Sendu okkur þá línu á fokus@fokus.is
Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Fókus
Fyrir 21 klukkutímum

Gunnar missti foreldra sína ungur: Dauðinn nálægur í grípandi og hnyttnum smásögum

Gunnar missti foreldra sína ungur: Dauðinn nálægur í grípandi og hnyttnum smásögum
Fókus
Fyrir 22 klukkutímum

Halldór Helgason valinn snjóbrettamaður ársins

Halldór Helgason valinn snjóbrettamaður ársins
Fókus
Í gær

Vertu með í jóladagatali HIITFIT – Afþakkaðu sykur í dag

Vertu með í jóladagatali HIITFIT – Afþakkaðu sykur í dag
Fókus
Í gær

Berglind Festival fer yfir jólaundirbúninginn – „Af hverju eignuðust Grýla og Leppalúði engar stelpur?“

Berglind Festival fer yfir jólaundirbúninginn – „Af hverju eignuðust Grýla og Leppalúði engar stelpur?“
Fókus
Fyrir 2 dögum

Magnaðar myndir frá fimmta áratugnum – Sjáðu hvernig Reykjavík hefur breyst – Veist þú hvar þessar myndir voru teknar?

Magnaðar myndir frá fimmta áratugnum – Sjáðu hvernig Reykjavík hefur breyst – Veist þú hvar þessar myndir voru teknar?
Fókus
Fyrir 2 dögum

Óhugnanlegt manndráp á Laugarnesvegi – Tímavélin

Óhugnanlegt manndráp á Laugarnesvegi – Tímavélin