Valdimar Víðisson, skólastjóri og formaður fjölskylduráðs í Hafnarfirði, segist ekki vera á Tinder enda hamingjusamlega giftur. Valdimar segir að einhverjir gárungar séu sífellt að búa til falsreikninga á samfélagsmiðlum í hans nafni og nýjasta útspil þeirra sé að stofna aðgang á Tinder.
Valdimar ræddi þetta á útvarpsstöðinni K100 í gær. „Það voru símtöl og fleira sem konan var að fá í gær þar sem hún var spurð hvað við værum nú að gera. Það var reyndar einn sem stakk upp á því að þetta væri annað Icehot1 mál og við hefðum bara gleymt að loka reikningum. Það var ekki þannig,“ sagði Valdimar.
Eins og gefur að skilja þá er þetta óþægilegt fyrir Valdimar.
„Það virðist vera auðvelt að stofna þessa aðganga en erfitt að fá það í gegn að þeim sé lokað. Bölvað vesen,“ sagði Valdimar. Þetta er ekki eina skiptið sem hann lendir í þessu því á dögunum var stofnaður Twitter-aðgangur í hans nafni. „Ég kom ekki nálægt því. Ég hef ekki grun um hver eða hverjir gætu átt þarna í hlut,“ sagði Valdimar.
Viðtalið má hlusta í heild sinni hér.