Kvikmyndin Víti í Vestmannaeyjum vann á föstudag til verðlauna á Chicago International Children’s Film Festival. Myndin keppti í flokki kvikmynda í fullri lengd og hlaut verðlaun barnadómnefndar hátíðarinnar.
Verðlaunin eru mikill gæðastimpill en hátíðin er stærsta og elsta kvikmyndahátíð ætluð börnum í Norður Ameríku. Þetta eru þriðju alþjóðlegu verðlaun kvikmyndarinnar en hún hefur keppt á hátíðum um allan heim.
Víti í Vestmannaeyjum sló í gegn í bíóhúsum landsins fyrr á þessu ári en yfir 35 þúsund manns sáu hana í bíó. Víti í Vestmannaeyjum: Sagan Öll sjónvarpsþættir hafa verið á dagskrá RÚV í vetur.
Víti í Vestmannaeyjum byggir á samnefndri metsölubók Gunnars Helgasonar og fjallar um hinn tíu ára gamla Jón sem fer ásamt liðsfélögum sínum í fótboltaliðinu Fálkum í þriggja daga keppnisferð á fótboltamót í Vestmannaeyjum. Þar kynnist hann Ívari, jafnaldra sínum úr ÍBV sem þarf óvænt á hjálp að halda, og allt í einu eru átökin bundin við fleira en fótboltavöllinn. Leikstjóri myndarinnar er Bragi Þór Hinriksson en Sagafilm sá um framleiðslu.
Víti í Vestmannaeyjum heitir The Falcons á ensku en hér má finna meira um verðlaunin og Chicago International Children’s Film Festival.