Sigfús Sigurðsson, fyrrum handboltamaður, opnar á mánudag Fiskbúð Fúsa að Skipholti 70 í Reykjavík. Þar var áður Hafið fiskverslun, en Fúsi keypti reksturinn.

Þó að draumurinn um eigin fiskbúð hafi blundað lengi í Fúsa, er aðdragandinn að kaupum og opnun þó afar stuttur. Systir hans og mágur koma að kaupunum og var skrifað undir kaupsamning á miðvikudag og Fúsi ætlar að opna á mánudag.

Fúsi er einn af þekktustu handboltamönnum landsins og spilaði hann með landsliði karla í fjölda ára við góðan orðstír. Eftir að ferlinum lauk, þá var komið að plani B og fór svo að Fúsi fór að vinna hjá Kristjáni í Fiskikónginum fyrir jólin 2013. Líkaði honum vinnan vel og á mánudag rætist draumurinn um eigin fiskbúð.

Í samtali við DV segir Fúsi að það sé allt að smella hægt en örugglega. „Ég verð alla helgina að gera allt tilbúið og ætti að ná töluvert miklu.“

Allir ættu að geta fundið fisk við sitt hæfi í Fiskbúð Fúsa, sem sjálfur ólst upp við að allur fiskur var á boðstólnum heima hjá honum. „Þannig að mér ber eiginlega bara skylda að vera með allt saman, gellur, kinnar, saltfisk og siginn fisk fyrir alla sem koma. Þannig að ég verð með bæði gamla skólann og nýja skólann.“