Saga knattspyrnumannsins Ingólfs Sigurðssonar verður umfjöllunarefnið í öðrum þætti í þriðju seríu af bandarísku heimildaþáttaseríunni Religion of Sports. Þátturinn verður sýndur í nóvember og kemur á Netflix á næsta ári. Einn framleiðanda þáttanna er Tom Brady, leikstjórnandi bandaríska ruðningsliðsins New England Patriots.

Umfjöllunarefni þáttanna er íþróttir og fólkið sem þær stundar, fylgst er með íþróttafólkinu og hvernig íþróttir sameina fólk.

Ingólfur hefur vakið mikla athygli á undanförnum árum fyrir að ræða á opinskáan hátt um baráttu sína gegn kvíða og þunglyndi og hvernig veikindin höfðu áhrif á atvinnumannaferil hans, en Ingólfur fór ungur að aldri til hollenska félagsins SC Heerenveen.

Í samtali við Fréttablaðið segir Ingólfur að framleiðendur þáttanna hafi verið mjög áhugasamir um að segja sögu hans.

„Þeir tóku upp mörg viðtöl við mig og upplifun mína af því að vera upprennandi knattspyrnumaður og vera í atvinnumennsku og upplifunina af því að fá svo allt í einu allt annað verkefni í hendurnar, það er að segja að glíma við geðsjúkdóm.“

Upptökur fóru fram í sumar á Íslandi og vildu tökumenn kynnast þeim stöðum sem tengjast Ingólfi og hans sögu. „Þeir í raun vildu bara kynnast mér. “

Saga Ingólfs um baráttu hans við kvíða og þunglyndi er fyrirferðarmikil í þættinum, enda segir Ingólfur ekki algengt að íþróttamenn tali opinskátt um slík mál. Segir hann að framleiðendur geti ekki beðið eftir að sýna þáttinn, sem hann segir nokkuð stærri í umfangi en hann hafi búist við í fyrstu.