Tónelska parið Sigríður Eyrún Friðriksdóttir og Karl Olgeirsson eiga von á stúlkubarni í febrúar á næsta ári. Þetta tilkynnti söngkonan á Facebook-síðu sinni í dag.
Sigríður Eyrún, eða Sigga Eyrún, og Karl hafa verið saman í rúm fimm ár og hafa notið mikillar velgengni í tónlistinni. Voru þau til dæmis hársbreidd frá því að fara út fyrir Íslands hönd í Eurovision árið 2014 með lagið Lífið kviknar á ný sem þau sömdu saman.
Þjóðin fylgdist agndofa með Kastljóss viðtali við parið í lok ágúst árið 2016 þar sem þau fóru yfir fæðingu sonar síns, Nóa Hrafns, árið 2015. Hann lést skömmu eftir fæðingu vegna mistaka starfsfólks. Þóttu Sigga Eyrún og Karl takast á aðdáunarverðan hátt við erfiðleikana – þrautagöngu sem engum er óskandi í þessu lífi.
Nú á parið, eins og fyrr segir, von á sínu öðru barni saman og óskar Fókus þeim innilega til hamingju með litla gleðigjafann.