Guðmundar- og Geirfinnsmálin
Ekki sér enn fyrir endann á þessu stærsta sakamáli Íslandssögunnar. Mögulegt er að málin verði rannsökuð upp á nýtt og aldrei að vita nema gerendur fái makleg málagjöld. Líf ungs fólks varð aldrei samt. Spilltir lögreglulmenn svífast einskis. Þetta handrit hefur allt.
Hrunið
Íslenska efnahagshrunið er fordæmalaust með öllu og því væri hægt að gera góðan trylli sem gerist dagana fyrir og eftir hrunið, þar sem pólitíkusar eru í geðshræringu og braskarar reyna að bjarga sér. Á meðan missa margir saklausir allt sitt.
Fjallið
Ungur sláni frá Akranesi umbreytist í mannlegan Hulk. Sigrar í keppnum og á leiklistarsviðinu. Peningum rignir inn. Undir niðri kraumar ólga í einkalífinu sem ekki sér fyrir endann á.
Bláa hafið
Upprisa íslenska landsliðsins í knattspyrnu. Byrjar á tapleik gegn Liechtenstein og endar á jafntefli gegn Argentínu í Moskvu. Algjör óþarfi að fjalla um síðustu leikina og það má alls ekki minnast á Eric Hamren. Þetta verður klisjukennd Hollywood-mynd, ekki raunsæ evrópsk harmsaga sem verður bara sýnd í Bíó Paradís.
Skákað í skjólinu
Upphafsatriði: Fíkniefni gerð upptæk á skrifstofu Skáksambands Íslands. Á sama tíma lamast íslensk kona í dularfullu slysi á Spáni. Öll spjót beinast að eiginmanninum. Týndur bílaleigubíll, sviðin jörð í viðskiptum á Íslandi. Erlendar mafíur blandast inn í málið.
