„Ég var einu sinni beðin um að vera með uppistand ásamt strák sem hafði kannski svona þrisvar verið með uppistand. Mér fannst tilboðið sem ég fékk svo lágt að ég hringdi í hann og spurði hvað honum hefði verið boðið. Það var nákvæmlega 25% hærra en mér var boðið.“

Þetta segir leikkonan og uppistandarinn Saga Garðarsdóttir á Twitter.

Á miðvikudag var haldinn baráttufundur á Arnarhóli og voru konur hvattar til að leggja niður vinnu klukkan 14.55 þann dag. Samkvæmt tölum Hagstofu Íslands um launamun kynjanna eru meðalatvinnutekjur kvenna 74 prósent af meðalatvinnutekjum karla.

Dæmið sem Saga bendir á er langt því frá einsdæmi. Saga segir á Twitter að hún hafi ekki lent í þessu lengi og hvorki hún né karlkyns uppistandarinn hafi tekið tilboðinu.

Hún segir svo: „Fékk oft líka ,,Heyrðu [einhver karlskemmtikraftur] er svo dýr – ekki kæmist þú….” Þá segist hún enn fá ákveðin símtöl sem eru á þessa leið: ,,Vorum með [kk skemmtikraftur] í fyrra og [annar kk skemmtikraftur] í hittífyrr og okkur vantar einhverja stelpu núna í ár….”

Saga segir svo frá því að þegar móðir hennar var ólétt af eldri systur Sögu þá hafi hún gengið úr tíma í MR á fyrsta kvennasamstöðufundinn og hugsað ákveðið: „Þetta verður komið þegar dóttir mín verður fullorðin. Í gær mættu þær báðar saman og fóru bara að gráta. Megum ekki hætta,“ sagði Saga á Twitter-síðu sinni í gærkvöldi.

Ég var einu sinni beðin um að vera með uppistand ásamt strák sem hafði kannski svona þrisvar verið með uppistand. Mér fannst tilboðið sem ég fékk svo lágt að ég hringdi í hann og spurði hvað honum hefði verið boðið. Það var nákvæmlega 25% hærra en mér var boðið.

— Saga Garðarsdóttir (@harmsaga) October 25, 2018