Netflix-þættirnir The Haunting of Hill House hafa vakið talsverða athygli að undanförnu og það ekki að ástæðulausu. Þættirnir þykja sérlega hrollvekjandi en á sama tíma einstaklega vel heppnaðir.
Þættirnir eru lauslega byggðir á samnefndri sögu Shirley Jackson frá árinu 1959 þó sögunni hafi í meginatriðum verið breytt. Þættirnir segja frá Crain-fjölskyldunni sem árið 1992 flytur inn í gamalt stórhýsi. Þar fara drungalegir hlutir að gerast sem að lokum verður til þess að fjölskyldan flytur. Tuttugu og sex árum síðar, árið 2018 nánar tiltekið, banka draugar fortíðar aftur upp á.
Þættirnir hafa hlotið einróma lof gagnrýnenda og eru til að mynda með einkunnina 9,1 á IMDB. Þá eru þeir með 92% á Rotten Tomatoes og 80/100 á vef Metacritic. Þeir sem hafa séð þættina geta vottað að þeir eru býsna drungalegir en ekki er víst að allir hafi tekið eftir öllum draugunum sem stundum eru býsna vel faldir. Screenrant tók saman meðfylgjandi myndir.
