Það fylgir hinu mannlega eðli að gera mistök í lífinu eða gleyma nöfnum, jafnvel rugla saman nöfnum eða einstaklingum. Að geta viðurkennt mistökin er annars vegar ekki sjálfsagður hlutur. Svanhildur Hólm Valsdóttir, lögfræðingur og aðstoðarmaður fjármálaráðherra, greinir frá eftirminnilegri minningu sem hún segir vandræðalega.
Í samtali við Sunnudagsmoggann viðurkennir Svanhildur að hún hafi haldið að Páll Valur Björnsson, fyrrverandi þingmaður Bjartrar framtíðar, hafi verið á þingi fyrir Framsóknarflokkinn. Hélt hún í tæpt ár að Páll Valur væri Framsóknarmaður.
„Hann var bara eitthvað svo „framsóknarlegur,““ segir Svanhildur og segir Alþingi hafa fyllst haustið 2013 af nýjum Framsóknarmönnum. Þarna var „þessi gaur“ sem hún hafði ekki tekið mikið eftir og setti hann í sama flokk með hinum framsóknarmönnunum.
Þangað til vors ársins 2014 en sat Svanhildur í hliðarsal og komst í spjall við Pál Val. Þá áttaði hún sig á því að hann væri ekki með sömu afstöðu til ríkisstjórnarinnar og hún. „Ég veit. Úff,“ segir Svanhildur en hún segist mjög slæm með andlit fólks almennt. Hún geti þó munað hvenær allir þingmenn eigi afmæli og sé stundum glögg á andlit þegar það skipti engu máli. Þá bætir hún við að hún sé löngu hætt að reyna að kjafta sig út hinum og þessum aðstæðum þar sem ómanngleggni hennar sé til vansa. Á móti segist Svanhildur vera mikill fylgismaður þess að nota nafnspjöld.
„Það sem kemur mér í vandræði, mjög oft, er að ég man aldrei neitt,“ segir Svanhildur. „Þetta er svipað og að vera litblindur. Það eina sem bjargar mér frá fullkominni örvæntingu yfir því hvað ég er mikið úti að aka er hvað ég er mikið úti að aka.“