Rut Hrafns Elvardóttir, laganemi, fór til tannlæknis í gær til að láta fjarlægja úr sér endajaxl. Eftir að aðgerðinni lauk ákvað Rut að fá að eiga jaxlinn og bað tannlækninn um að bora gat í gegnum hann miðjan. Því næst útbjó hún hálsmen fyrir kærastann sinn.
„Bjó til hálsmen handa Baldri úr endajaxlinum svo hann gæti verið með hluta af mér með sér alla daga alltaf,“ skrifaði Rut í færslu á Twitter þar sem hún greindi fyrst frá málinu.
Fór í endajaxlatöku og bjó til hálsmen handa Baldri úr endajaxlinum svo hann gæti verið með hluta af mér með sér alla daga alltaf ?? pic.twitter.com/jl36Ko9g9m
— ruthrafns (@ruthrafns) August 16, 2018
Í samtali við DV segir Rut uppátækið meira hafa verið gert til gamans en Baldur, kærastinn hennar sé hins vegar alsæll. „Ég fæ að eiga jaxlinn og tannlæknirinn spyr hvort ég haldi virkilega að kærastinn minn ætli virkilega að ganga með þetta. Ég svara því þannig að ef hann elski mig í alvörunni þá verði hann að vera með hluta af mér á sér,“ segir Rut og hlær.
Gjöfin vakti að sögn Rutar óvænta lukku. „Honum finnst þetta bara geðveikt og hefur ekki tekið þetta af sér síðan,“segir Rut að lokum.