Hefur þig dreymt um að vera ofurhetja? Eða bara að geta flogið? Þá er hægt að fara út í búð og kaupa eitt stykki alvöru flugbúning.
Breski uppfinningamaðurinn Richard Browning bjó til sinn eigin búning, sem er að mestu leyti hugsaður sem alvöru útgáfa af búningi ofurhetjunnar Iron Man, og hefur nú sett hann á sölu. Hægt er að kaupa búninginn í verslun Selfridges í Lundúnum, verðið gæti sett strik í reikninginn en búningurinn kostar 340 þúsund pund, eða rúmar 47 milljónir króna.
Búningurinn samanstendur af fimm þotuhreyflum, einn á bakinu og tveimur á hverjum handlegg. Browning leyfði áhugasömum að sjá hvernig hann virkar fyrir utan verslunina, en hann hefur verið á ferð og flugi um heiminn að sýna hann, hér má sjá hann í Mumbai á Indlandi í mars síðastliðnum:
Búningurinn er eyðslufrekur á bensín, rúma 4 lítra fyrir hverja mínútu og getur því flogið í allt að 9 mínútur. Hann nær upp í 12 þúsund feta hæð og fer á rúmlega 50 km hraða. Browning segir í samtali við NY Post það ekki erfitt að fljúga: „Þetta er merkilega rólegt, það er mjúkt að fljúga honum.“