Nú hefur streymiveitan tilkynnt að nýja serían verði gefin út í tveimur hlutum. Þættirnir eru 16 talsins og verða fyrstu 8 fáanlegir vestanhafs og víða þann 29. maí.
Arrested Development er ekki eina þáttaröðin sem gengur í gegnum þessa breytingu og verður hið sama gert með nýjustu þáttaraðirnar af The Ranch og Unbreakable Kimmy Schmidt.
Ástæða þessara skiptinga er sögð vera til að þættirnir eigi betri möguleika á Emmy-verðlaunum. Skilafresturinn til að senda inn efni til þátttöku er 31. maí.
Í tilfelli Arrested Development hefur nefndin tvo daga til að klára fyrri hluta seríunnar. Þó aðdáendur séu eflaust svekktir að geta ekki „hámhorft“ á þættina í einum rykk, bendir þetta til þess að framleiðendur hafi mikla trú á því sem þeir hafa í höndunum.
Fyrri þáttaraðirnar hafa unnið til fjölda verðlauna en sú fjórða kom út árið 2013 og fékk misjafnar viðtökur.
Seinni hluti fimmtu seríu verður gefinn út þegar líður að hausti.
Hins vegar þykir ólíklegt að þessi þáttaröð verði fáanleg á Netflix á Íslandi, líkt og hinar.
