Fókus

Magnað myndband: Þetta gat hann á þremur mánuðum og svona fór hann að því

Ritstjórn DV
Fimmtudaginn 19. apríl 2018 17:00

Það tók Bandaríkjamanninn Hunter Hobbs aðeins þrjá mánuði að ná undraverðum árangri í ræktinni. Hann tók myndir af sér á hverjum degi í þessa þrjá mánuði og á myndbandinu hér neðst í fréttinni má sjá breytinguna. Óhætt er að segja að sjón sé sögu ríkari.

Á þessum þremur mánuðum ákvað Hunter að taka mataræði sitt rækilega í gegn auk þess sem hann stundaði ræktina af kappi. Hobbs vinnur í dæmigerðu skrifstofustarfi og er 24 ára.

„Í hreinskilni sagt þá gerði ég þetta til að athuga hvað myndi gerast ef ég myndi einbeita mér 100% að þessu markmiði í tólf vikur,“ segir hann í samtali við Independent.

Á þessum þremur mánuðum léttist Hobbs um tæp tuttugu kíló. Eins og sést á meðfylgjandi myndbandi jókst vöðvamassi hann talsvert á sama tíma.

Hann segist hafa farið í ræktina fimm til sex sinnum í viku þar sem hann lyfti lóðum af krafti. Hann lauk svo hverri æfingu á léttri brennslu í um tuttugu til þrjátíu mínútur. Er þá átt við hlaup, hjólreiðar eða hreyfingu á skíðavél svo dæmi séu tekin. Mataræðið tók hann einnig rækilega í gegn enda er gott og hollt mataræði forsenda breytinga sem þessara.

Hann segir að matseðillinn þessa þrjá mánuði hafi að mestu leyti verið skipaður kjúklingi, sætum kartöflum, salati, höfrum og eggjum. „Ég reyndi að forðast alla sykraða drykki og áfengi.“

„Þetta var vissulega dálítið öfgakennt en þú getur klárlega náð góðum árangri með minni fyrirhöfn,“ segir hann. Myndbandið sýnir, svo ekki verður um villst, að allt er hægt ef viljinn er fyrir hendi.

 

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af