„Já, ég hef hugleitt að bjóða mig fram. Ég hef fengið fjölda áskorana,“ segir Agnes í samtali við DV.

Það sem fólk hafði að segja:
- „Agnes er frábær manneskja og réttsýn. Hún er einlægur jafnréttis- og friðarsinni. Biskupsembættið yrði virðulegt ef hún yrði biskup.“
- „Hún er svo frábær í alla staði og myndi gegna þessu hlutverki með sóma.“
- „Hún er heiðarleg og réttsýn kona sem stendur á sínu. Hún myndi vinna að málefnum alls landsins og sinna stuðningi við prestastéttina.“

„Ég hef alveg íhugað þetta en er búinn að komast að þeirri niðurstöðu að ég er ekki biskupsefni. Það er ekki minn tebolli að vera biskup Íslands,“ segir Bjarni í samtali við blaðamann. Hann segir að það sé alveg skýrt af hans hálfu að hann hafi ekki áhuga á embættinu. „Maður á að gera það sem maður gerir best þannig að ég ætla að halda áfram að veita sálgæslu og predika.“

Það sem fólk hafði að segja
- „Hann myndi styrkja ímynd kirkjunnar. Traustur og heiðarlegur.“
- „Hann er frábær maður, frábær leiðtogi og á allt gott skilið.“
- „Maður sáttar og maður friðar. Maður sem sameinað gæti kirkjuna og þjóðina á góðan hátt – frábær einstaklingur.“

„Ég er búinn að vera að velta þessu fyrir mér og hef fengið töluvert mikið af áskorunum um það,“ segir Gunnar aðspurður hvort hann hafi hug á að bjóða sig fram í embætti biskups. „Ég verð að taka dálítið mark á því en ég hef ekki gefið neina yfirlýsingu um að ég sé í framboði. Ég ætlaði mér að hugsa þetta vel um helgina. Það er mikið af skínandi góðu fólki sem er búið að bjóða sig fram og ég er ekki betri og ekki verri en það. Ég er búinn að vera hér í fimmtán ár og ég ætla ekki að vera hérna þangað til söfnuðurinn fær leið á mér,“ segir Gunnar og hlær.

Það sem fólk hafði að segja:
- „Ákveðinn og auk þess handhafi titilsins sterkasti prestur í heimi.“
- „Hann er hreinn og beinn og yrði glæsilegur biskup Íslands.“
- „Hann er með sterka lyndiseinkunn og fastur fyrir.“

„Já, ég hef alveg velt því fyrir mér en það er ekki komin nein niðurstaða,“ segir Jóna Hrönn í samtali við DV þegar hún er spurð hvort hún íhugi að bjóða sig fram til biskups. „Ég er bara að hlusta en ég finn fyrir stuðningi. Ég er á þeim stað núna að ég þarf að hlusta á fólk. Hver sem ákvörðunin verður þarf ég að taka hana á næstu dögum,“ segir hún.

Það sem fólk hafði að segja
- „Mannvinur og mannasættir.“
- „Þessi kona virkar heiðarleg, skemmtileg, mannleg og mér líst mjög vel á hana sem biskup.“

„Ég tók á síðasta ári ákvörðun um að vera í kjöri til vígslubiskups og þegar maður gerir það er maður þar með tilbúinn til að axla ábyrgð í kirkjunni,“ sagði Kristján Valur í samtali við mbl.is en hann tilkynnti á dögunum að hann hygðist bjóða sig fram til biskups.

Það sem fólk hafði að segja:
- „Góður og heiðarlegur maður.“
- „Hann hefur til að bera hlýju, þægilega nærveru, framkomu og rödd sem hæfir, mjög vel máli farinn, djúpþenkjandi ræðumaður og predikari.“
- „Góður maður og vel menntaður.“
- „Frambærilegur og fræðimaður góður.Mannvinur, þægilegur að umgangast og getur gert það sem þarf að gera sem biskup Islands.“

„Ég er ekki búinn að gera upp hug minn í þessum efnum. Það eru ýmsir sem sækja þetta og vilja þetta. Ég veit að ég hef töluverðan stuðning en það er spurning hvort maður gefi sig í þetta. Það mun koma í ljós,“ segir Örn Bárður.

Það sem fólk hafði að segja
- „Frábær prestur, góður maður, öflugur stjórnlagaráðsfulltrúi.“
- „Það þarf sameiningartákn fyrir kirkjuna og ég er þess fullviss að hann er sá maður.“
- „Hann hefur á undanförnum árum sýnt hugrekki sitt í verki.“

„Við þurfum meðal annars að taka á þeim ömurlega veruleika sem kynferðisofbeldi er og taka virkan þátt í að uppræta það,“ sagði Sigríður við DV í síðustu viku. Hún hefur opinberlega lýst því yfir að hún ætli að bjóða sig fram til biskups.

Það sem fólk hafði að segja
- „Yndisleg kona og mun gegna þessu embætti betur en nokkur annar.“
- „Hún er heiðarleg og kjarkmikil.“
- „Því hún er rödd fjöldans. Er óhrædd við að vinna á móti gamaldags stefnu þjóðkirkjunnar og myndi hrífa fólkið með sér.“
- „Sigríður hefur verið ötull talsmaður réttlætis, víðsýni og framfara innan Þjóðkirkjunnar og það er nákvæmlega það sem kirkjan þarf á að hald um þessar mundir.“

„Þjóðkirkjan er á breytingaskeiði og hennar hlutverk er að vera kirkja fólksins. Kirkjan á að vera framsækin, frjálslynd, lífleg og öllum opin. Hún á að vera sóknarkirkja en ekki varnarkirkja,“ sagði Sigurður í yfirlýsingu, en hann hefur upplýst að hann ætli að bjóða sig fram til biskups.

Það sem fólk hafði að segja:
- „Hann er vel menntaður, víðsýnn og íhugull.“
- „Geðþekkur vel ættaður einstaklingur og prestur með þroskaðar eðlisgáfur. Frábær sálusorgari. Auðskilinn í ræðu og riti.“
- „Heilsteyptur einstaklingur, flott efni sem kemur frá honum í ræðu og riti.“
- „Frábær ræðumaður, góður fræðari og heill í gegn.“

Þórhallur tilkynnti um framboð sitt í lok janúar. „Það eru margir búnir að spyrja mig,“ segir Þórhallur í samtali við DV. Hann segist taka þessa ákvörðun að vel ígrunduðu máli og eftir ítarlegt samtal við kjörmenn, bæði leika og lærða. „Vil ég nota tækifærið og þakka öllum sem hafa hvatt mig bæði leynt og ljóst til að taka þessa ákvörðun.“

Það sem fólk hafði að segja
- „Hann er mjög góður ræðumaður og hefur góða útgeislun.“
- „Góður fræðimaður og auk þess virðist hann hafa góðan skilning á því hvað það er að lifa.“
- „Hann er frábær maður, mikill mannvinur og bráðgreindur með mikla réttlætiskennd.“
- „Langbesti prestur Íslendinga.“

„Ég, Þórir Jökull Þorsteinsson, hef ákveðið að gefa kost á mér til embættis biskups Íslands. Þessi ákvörðun mín hvílir á því að ég sé réttilega til þessa kallaður eins og þau önnur sem hug hafa á leiða hið kirkjulega samfélag flestra Íslendinga. Þá hafa allmörg úr hópi vina og fyrrverandi sóknarbarna ýmist nefnt þetta eða hvatt mig til þessa,“ sagði Þórir meðal annars í yfirlýsingu sem hann sendi DV á miðvikudag.

Það sem fólk hafði að segja
- „Góður kirkjunnar þjónn.“
- „Hann er líklegur til að færa stjórnsýslu kirkjunnar til nútímans.“
- „Hann er maður með bein í nefinu og ætíð verið starfi sínu vaxinn í þeim prestaköllum þar sem hann hefur þjónað. Heiðarlegur og góður maður og tel ég að hann hafi góða hæfileika til þess að þjóna því embætti sem biskupsstóllinn er.“