Það voru eflaust margir sem hoppuðu hæð sína af kæti þegar að fréttir þess efnis að McDonalds væru á leið aftur til Íslands bárust í gær. Tímaritið Vol.is sendi út frétt þess efnis að McDonalds hefði gengið frá samningum við N1 um að opna McDonalds staði á bensínstöðvum út um land allt og búið væri að semja til tíu ára um tíu staði. Fréttin birtist víðar, til dæmis vitnaði fréttavefur RÚV í umrædda frétt, áður en hún var tekin út af vef ríkisfjölmiðilsins.

Samkvæmt Hermanni Guðmundssyni forstjóra N1 er þetta þó ekki á rökum reist og segir hann enga samninga hafa verið gerða þess efnis. „Það er ekkert til í því og ég veit ekki hvaðan sú hugmynd er sprottin,“ segir Hermann. „Það hefur enginn rætt við þá eða nokkur maður minnst á þetta innanhúss hjá okkur.“

Íslendingar verða því að bíða heldur lengur eftir því að Mcdonalds snúi aftur en skyndibitakeðjan hætti hér á landi árið 2009 þar sem fyrirtækið sem átti réttinn á vörumerkinu hér á landi, Lyst ehf, þurfti að kaupa aðföng erlendis vegna sérstakra staðla McDonalds og reyndist það vera of stór biti fyrir fyrirtækið í erfiðu efnahagsumhverfi.

Frétt vol.is McDonalds kemur aftur til Íslands