„Kaplamjólkin er heilsubætandi og allra meina bót og við höfum gert þetta í þrjú ár,“ segir Hekla Hermundsdóttir hestafræðingur en hún og faðir hennar, Hermundur Jörgensson, hafa mjólkað hryssur í þrjú ár á bænum Ásmundarstöðum í Ásahreppi.

Full af D-vítamíni
Kaplamjólk er líkust móðurmjólkinni í samsetningu og hefur hátt hlutfall af D-vítamíni. Hekla segir fólk sem sé haldið húðsjúkdómum og meltingarfærasjúkdómum nota mjólkina aðallega. Hún hafi verið gefin ungbörnum í gamla daga og líklega bjargað mörgum þeirra. „Þetta er gömul hefð sem var notuð hér í gamla daga en erlendis er þetta ennþá þekkt.“
Aðspurð hvort þau hafi sannreynt ágæti mjólkurinnar játar Hekla því og segir að þau hafi drukkið hana frá 2009. „Það er mikil næring í henni og svo er hún svo góð fyrir andlega líðan. Hún hreinsar líkamann og er mun betri en mig hefði grunað.“