Neytendasamtökin ráðleggja fólki að setja fyrirvara við afborganir af myntkörfulánum, sem héraðsdómur dæmdi á dögunum að væru ólögleg. Áður en niðurstaða Hæstaréttar liggur fyrir ætti fólk sem hyggst nýta sér myntbreytingu, frystingu eða höfuðstólslækkun lána að setja fyrirvara þegar afborganir eru greiddar.

„Til að auðvelda sönnun er nauðsynlegt að tilkynna lánveitanda um fyrirvarann með skriflegum hætti, t.d. með tölvupósti eða bréflega, ásamt því að bæta fyrirvaranum á greiðsluseðilinn. Orðalag fyrirvarans gæti verið á þessa leið: Greitt með fyrirvara um lögmæti lánsins,“ segja samtökin.