Bananar, rúsínur og harðfiskur eru dæmi um skyndibita sem uppfyllir bæði þau skilyrði að vera ákaflega ríkur af mikilvægum næringarefnum og afar handhægur. DV naut tók saman tíu heilsusamleg matvæli sem borða má hvenær sem er í amstri dagsins. Blaðið naut aðstoðar næringarfræðinga við hvaða efni er að finna í matnum og hvaða áhrif þau geta haft á líkamann.

Bananar
Eru afar ríkir af steinefninu kalíum. Ef efnið vantar í líkamann getur það haft slæm áhrif á blóðþrýsting, þess vegna er talað um að gott sé fyrir fólk með háan blóðþrýsing að borða banana. Þeir eru mjög auðugir af kolvetnum sem er aðal orkugjafi líkamans. Banani er auk þess trefjaríkur.

Harðfiskur
Er ríkur af Omega-3 fitusýrum og er hlaðinn hágæða próteinum. Fitusýrurnar virðast geta dregið úr bólgumyndun og rannsóknir benda til þess að þær geti haft jákvæð áhrif á heilastarfsemina. Nýlegar rannsóknir benda til að Omega fitusýrur geti jafnvel dregið úr depurð.

Hnetur
Eru mjög auðugar í andoxunarefnum eins og e-vítamínum. Þau hafa jákvæð áhrif til varnar krónískum hrörnunarsjúkdómum. Mikilvægt er að fá nóg af e-vítamínum en of mikið magn hefur ekkert að segja. Í hnetum eru fjölómettaðar fitusýrur en þriðjungur fitunnar í fæðinu ætti að vera í því formi; þriðjungur úr einómettuðum fitusýrum (t.d. ólífuolía) og þriðjungur úr mettuðum fitusýrum (hörð fita). Íslendingar fá að jafnaði 2/3 hluta fitunnar úr mettaðri fitu. Það hlutfall má bæta með því að borða hnetur endrum og eins í stað afurða sem innihalda harða fitu (t.d. djúpsteiktar kartöflur).

Gulrætur
Sprengfullar af alls kyns næringarefnum eins og c-vítamínum og efnum sem kallast beta-karótín. Það eru jurtaefni sem umreytast í a-vítamín en skortur á því leiðir til næturblindu eða jafnvel blindu í alvarlegum tilfellum. Skortur á a-vítamínum hjá börnum er algengasta orsök blindu, þegar heimurinn allur er skoðaður. A-vítamín eru andoxunarefni sem hafa jákvæð áhrif í för með sér fyrir líkamann, að því skyldu að við fáum efnið úr fæðu, en ekki fæðubótarefnum.

Tómatar
Líkt og eins gulrætur innihalda tómatar karótín-efni. Efnið í tómötum kallast lýkópen. Ef það er í eðlilegu magni í líkamanum þá getur það hjálpað okkur í baráttu gegn ýmsum krónískum sjúkdómum. Þetta er einnig efni sem við verðum að fá úr fæðu til að það virki sem skyldi.

Bláber
Innihalda mikið magn andoxunarefna og talið er að neysla þeirra geti dregið úr einkennum hjá Alzheimer-sjúklingum og þeim sem þjást af elliglöpum. Rannsóknir sem gerðar voru á dýrum sýndu m.a. að neysla á bláberjum gæti lækkað kólesterólmagn í blóði og hjálpað til við stjórnun blóðþrýstings. Neysla Íslendinga á berjum er lítil og því ólíklegt að fólk borði yfir sig af berjum.

Hrein ab-drykkjarjógúrt
A- og b-gerlar eru taldir geta stuðlað að betri meltingu og geta dregið úr óæskilegum afleiðingum af inntöku sýklalyfja. Einhverjar rannsóknir benda til að gerlarnir geti dreið úr óheppilegum bakteríum og sveppum í meltingarvegi. Mjólkurvörur eru auk þess langbesta kalkuppsprettan í fæðunni en kalk er mikilvægur þáttur í byggingu beina.

Sólblómafræ
Eru rík af einómettuðum og fjölómettuðum fitusýrum en mikilvægt er að jafnvægi sé á milli þeirra og mettaðra fitusýra sem finnast meðal annars í djúpsteiktum mat. Þar sem orkan í sólblómafræjum, sem og öðrum fræjum, er mikil ættu þeir sem glíma við aukakíló ekki að borða sólblómafræ í óhófi. Þau eru enn fremur afar próteinrík og innihalda e-vítamín.

Rúsínur
Þurrkaðir ávextir á borð við sveskjur og rúsínur eru afar hollir. Sá sem borðar 50 rúsínur er að fá öll næringarefni sem finna má í sama magni af vínberjum. Einungis vatnið er farið. Fyrir vikið eru þurrkaðir ávextir ákaflega hiteiningaríkir og fólk sem er of þungt ætti að borða þurrkaða ávexti í hófi. Þeir eru þó afar trefjaríkir og stútfullir af vítamínum og steinefnum, rétt eins og ávextirnir sjálfir.

Hrökkbrauð
Gróft hafrakex eða hrökkbrauð er talið gott fyrir hægðirnar og meltinguna. Trefjaneysla Íslendinga er frekar lítil, um 15 til 17 grömm að jafnaði á dag. Hún mætti vera nærri 25 til 30 grömmum af dag svo hrökkbrauð án viðbætts sykurs er sérlega hentug fæða til að grípa í milli mála.